Spáir asahláku með slagviðri

„Þetta er slagviðri með asahláku sem verður sýnu verst á sunnan- og vestanverðu landinu," segir Sigurður Þ. Ragnarsson veðurfræðingur um veðrið í dag.

Í gær var 19 sentimetra jafnfallinn snjór á höfuðborgarsvæðinu og 15 sentimetrar á Akureyri. „Þar sem snjóalög eru þetta mikil eru niðurföll hulin. Ég tel því ástæðu til að minna fólk á að hreinsa frá niðurföllum svo forðast megi tjón af völdum vatns," segir Sigurður sem spáir rigningu í dag.

Sigurður segir að auki stefna í storm þegar líður á daginn. „Fólk ætti því sérstaklega að huga að jólaskreytingunum sem gætu þurft að þola talsvert veðurálag. Það er hálf súrt í brotið ef jólaskreytingarnar fjúka og kjallarar flæða bara fyrir það eitt að fólk gleymir að hreinsa frá niðurföllunum. Þetta er asahláka af myndarlegustu gerð og við erum að sigla inn í mikið hlýviðri næstu þrjá til fjóra daga."

Sigurður spáir hlýju og vindasömu veðri á Þorláksmessu og minni háttar skúrum. „Á aðfangadag jóla eru horfur á allhvassri sunnanátt, hita á bilinu 6 til 12 stig og rigningu og skúrum," segir Sigurður.