Útvarpsstjóri hótar að senda lögfræðinga á G. Pétur

Ríkisútvarpið mun leita réttar síns með aðstoð lögfræðinga, muni G. Pétur Matthíasson, fyrrverandi fréttamaður á RÚV, ekki skila gögnum sem hann tók frá RÚV innan sólarhrings og biðjast afsökunar á framferði sínu. Fram kemur á fréttavef RÚV að tilefnið sé að Pétur birti á bloggsíðu sinni viðtal sem hann tók við Geir H. Haarde forsætisráðherra árið 2007, þegar hann starfaði sem fréttamaður á RÚV.

Þar spurði Pétur um skoðanir Geirs á ummælum stjórnmálamanna um upptöku evru án inngöngu í ESB. Geir stöðvaði viðtalið vegna óánægju með spurningar Péturs. Á myndbandinu sjást svo orðaskipti Geirs og Péturs í kjölfarið, en upptakan var aldrei notuð.

Páll Magnússon segir, í bréfi til starfsmanna RÚV, að verði Pétur ekki við tilmælum sínum verði málið afhent lögfræðingum Ríkisútvarpsins til meðferðar. Hann segir að gögnin hafi verið tekin í heimildarleysi.

G. Pétur segist í samtali við Vísi hafa fengið mikil viðbrögð við birtingu myndskeiðsins á vefsíðu sinni og langflestir hafi þakkað sér fyrir birtingu þess. Fáir hafi haft beint samband við sig vegna málsins en margir vakið máls á því í gegnum Netið. G. Pétur segist enn vera að hugleiða hvernig hann muni bregðast við erindi útvarpsstjóra.