Ráðist gegn veggjakroti í Kópavogi

Allt að 20 milljónir króna verða veittar til þess að hreinsa veggjakrot og annan viðlíka óþrifnað af mannvirkjum í eigu Kópavogsbæjar á þessu ári. Þetta ákvað bæjarráð Kópavogs.

Í tilkynningu frá Kópavogsbæ segir að settur hafi verið á fót sérstakur vinnuflokkur á vegum áhaldahússins til að hreinsa eigur bæjarins, hús, girðingar, undirgöng og fleira ásamt sérhæfðum verktökum á tilteknum sviðum. Meðal annars hefur áhaldahúsið keypt öflugt háþrýstitæki í þessu skyni.

Miðað er við að hreinsunarátakið standi til ársloka og þá verði árangurinn af því metinn og ákveðið hvort grípa þurfi til frekari úrræða. Í tilkynningu bæjarins segir einnig að Kópavogsbær kæri þá til lögreglu sem eru staðnir að spellvirkjum á eignum bæjarins og leggur fram skaðabótakröfu á hendur þeim.