Fjárlögin vega að hjúkrunarheimilum

Stjórn Samtaka fyrirtækja í heilbrigðisþjónustu átelur stjórnvöld harðlega fyrir niðurskurð í heilbrigðiskerfinu í nýjum fjárlögum og segir vegið að starfsemi hjúkrunarheimila.

Í yfirlýsingu sem undirrituð er af Gísla Páli Pálssyni formanni samtakanna segir að þar á bæ geri menn sér grein fyrir mjög alvarlegri fjárhagslegri stöðu íslenska ríkisins og íslensks efnahagslífs. „Engu að síður er nauðsynlegt að gera alvarlegar athugasemdir við fram komin frumvörp til fjárlaga 2009 og fjáraukalaga 2008."

Bent er á að í fjáraukalögum er ekki gert ráð fyrir einni krónu til þess að greiða væntanlegan rekstrarhalla hjúkrunarheimila.

„Sá halli verður væntanlega um 800 milljónir króna af tæplega 14 milljarða króna veltu eða um 6 prósent. Skýring á þessum halla er fyrst og fremst sú að í fjárlögum ársins 2008 er gert ráð fyrir 3,5 prósenta hækkun verðlags en raunin er um 18 prósent hækkun. Þá hefur grunnur daggjalda verið of lágt metinn. Launabætur vegna kjarasamninga ársins hafa verið greiddar til þessara stofnana að hluta en enn vantar upp á að þessar greiðslur séu í samræmi við loforð sem gefin voru í tengslum við kjarasamningagerð síðastliðið sumar. Þessar stofnanir eru margar hverjar sjálfseignarstofnanir og hafa engar aðrar tekjur þannig að brýna nauðsyn ber til að greiða þennan rekstarhalla," segir einnig og fullyrt að margar þessara stofnana munu komast í þrot með launagreiðslur og greiðslur vegna annars rekstrarkostnaðar komi ekki til aukinna fjárframlaga.

„Í fjárlögum fyrir árið 2009 eru framlög skorin niður frá upphaflegu frumvarpi. Verði sú raunin mun þjónusta við aldraða skerðast verulega og í raun má segja að þar sé ekki af miklu að taka. Sama á við um aðrar stofnanir innan SFH og má þar nefna SÁÁ, Heilsustofnun NLFÍ og Sjálfsbjargarheimilið," segir ennfremur og að endingu er skorað á fjárlaganefnd Alþingis að gera breytingar á fjáraukalögum 2008 og fjárlögum ársins 2009 „með það að markmiði að tryggja mannsæmandi öldrunarþjónustu á hjúkrunarheimilum landsins og tryggja stofnunum SFH viðunandi rekstrargrundvöll."