Björgvin og Darling ræddu aðallega um Icesave á fundi sínum

Meginefni fundar Björgvins G. Sigurðssonar viðskiptaráðherra og Alistair Darling, fjármálaráðherra Bretlands, þann 2. september var að að æskilegt væri að færa Icesave-innstæðureikninga Landsbankans í London í breskt dótturfélag.

Þetta kemur fram í svari hans við fyrirspurn Sivjar Friðleifsdótttur, þingflokksformanns Framsókknarflokksins. Þar segir einnig að bresk stjórnvöld hafi unnið að því um nokkurt skeið ásamt íslenskum stjórnvöldum að fá Landsbankann til að flytja innstæður Icesave-reikninganna úr útibúinu í breskt dótturfélag.

„Bresk stjórnvöld gerðu mjög stífar kröfur um flutning eigna Landsbankans til Bretlands og um tímamörk fyrir eignaflutninginn. Tilgangurinn með fundinum var að fara fram á að bresk stjórnvöld heimiluðu að innlánsreikningarnir yrðu fluttir í breskt dótturfélag strax, en að Landsbankanum yrði gefinn eðlilegur frestur til skipulegs flutnings á eignum á móti innstæðum þannig að fjármögnunarsamningar bankans röskuðust sem minnst," segir í svari Björgvins sem segist ekki hafa tekið saman formlegt minnisblað um fundinn.