Misræmi í fullyrðingum Björgvins og aðstoðarmanna

Björgvin G. Sigurðsson, viðskiptaráðherra, og aðstoðarmenn hans greinir verulega á um þegar kemur að málefnum endurskoðunarfyrirtækisins KPMG og gamla Glitnis.

Frá því var greint í Kastljósi í gær að Björgvin hefði ekki vitað að KPMG hefði í tæpa tvo mánuði rannsakað viðskipti gamla Glitnis.

Björgvin var gestur í Kastljósi í kvöld þar sem umfjöllun um málið var haldið áfram. Í þættinum kom fram að Þorfinnur Ómarsson, upplýsingafulltrúi viðskiptaráðuneytisins, veitti Kastljósi þær upplýsingar ítrekað í gær að Björgvin hafi ekki vitað um úttekt KPMG á Glitni.

Auk þess vitnaði Kastljós í frétt Vísis frá því í gærkvöldi þar sem rætt var við Jón Þór Sturluson, aðstoðarmann Björgvins. Þar hélt Jón því fram að viðskiptaráðherra hafi vitað að rannsókninni en ekki hvaða fyrirtæki væri að vinna fyrir hvaða banka.

Þóra Tómasdóttir spurði Björgvin út í málið í kvöld sem sagðist ekki vita af hverju misræmis gætti í orðum hans og aðstoðarmanna hans. Björgvin sagðist hafa vitað í október af því þegar Fjármálaeftirlitið réð þrjár endurskoðunarskrifstofur til að vinna úttektirnar fyrir gömlu bankanna.

,,Ég sá það bara á blaði hverja þeir höfðu ráðið og velti því svo sem ekkert meira fyrir mér. Við ræddum það aldrei neitt sértaklega í ráðuneytinu."

Aðspurður um orð Jóns Þórs á Vísi í gær sagði Björgvin: ,,Það var það sem hann hélt enda ræddum við það aldrei. Hann hefur bara gefið sér það. Ég vissi í október hvaða fyrirtæki skoðaði hvaða banka."

Gagnrýnt hefur verið að KPMG hafi verið fengið til að vinna verkefnið fyrir Glitni en KPMG er endurskoðandi margra stærstu eiganda gamla Glitnis.

Björgvin sagðist hafa komist af hagsmunatengslum KPMG og Glitnis í fyrradag. ,,Mér var einfaldlega ekki ljóst um hagsmunatengslin. Ekki frekar en formanni stjórnar Fjármálaeftirlitsins sem ég ræddi við í morgun."

Í dag sagði KPMG sig frá úttektinni á gamla Glitni.