The Dark Knight nær líklegast ekki að skáka Titanic

Þrátt fyrir að nýja kvikmyndin um ævintýri Leðurblökumannsins, The Dark Knight, hafi slegið hvert aðsóknarmetið á fætur öðrum verður að teljast ólíklegt að myndin slái met stórmyndarinnar Titanic, sem kom út árið 1997, um heildartekjur vegna miðasölu.

Samkvæmt spám Warner kvikmyndafyrirtækisins er ekki talið að Leðurblökumaðurinn nái að hala inn „nema" rétt rúmlega fimm hundruð milljónum dollurum í Bandaríkjunum en Titanic vann sér inn um hundrað milljónum betur.

Á heimsvísu fékk Titanic 1,8 milljarða dollara í heildartekjur og á The Dark Knight töluvert langt í land með að landa þeirri summu, því myndin er í dag ekki einu sinni hálfdrættingur á við Titanic hvað varðar tekjur á heimsvísu.

Þess vegna eru allar líkur á því að Jókerinn, Leðurblökumaðurinn og vinur þeirra verði að sætta sig við sæti númer tvö yfir vinsælustu myndir sögunnar.

Reyndar verður í þessu samhengi að minnast á myndina Gone With the Wind frá 1939 sem með tilliti til verðþróunnar, gengis og verðbólgu er langtekjuhæsta mynd sögunnar.