Karlmaður lést í bruna á Blönduósi

Tæplega fimmtugur karlmaður lést þegar eldur kviknaði í íbúð í raðhúsi við Skúlabraut á Blönduósi í morgun. Hann var einn í húsinu. Þegar slökkvilið kom á staðinn var töluverður eldur og mikill reykur í íbúðinni. Samkvæmt upplýsingum lögreglunnar á Blönduósi var tilkynnt um eldinn klukkan 6:16 í morgun. Slökkvistarf tók um tvo klukkutíma en miklar skemmdir urðu á húsnæðinu.

Nágranni varð eldsins vart og tilkynnti til lögreglu. Ekki er vitað um upptök eldsins né hvar í húsinu hann kom fyrst upp.

Samkvæmt upplýsingum slökkviliðsins á Blönduósi vaknaði strax grunur um að einhver væri inni í húsinu þegar slökkvilið kom á vettvang. Maðurinn fannst svo þegar slökkviliðsmenn fóru inn.

Um er að ræða endaraðhús í raðhúsalengju. Næsta hús við hliðiná var í töluverðri hættu um tíma, en slökkviliði tókst að koma í veg fyrir að það skemmdist. Það hús var mannlaust.

Lögreglan á Akureyri fer með rannsókn málsins.