Öryggiseftirlit hert á Alþingi

Von er á því að öryggisreglur verði hertar og eftirlit aukið í alþingishúsinu vegna atburða dagsins, segir Helgi Bernódusson, skrifstofustjóri Alþingis. Þrjátíu manns ruddust inn í Alþingi í dag og voru sjö handteknir þegar að þeir neituðu að hlýða fyrirmælum lögreglu um að yfirgefa húsið. Tveir lögreglumenn og einn þingvörður meiddust í átökunum.

Helgi segist ekki geta sagt til um hvort auknar öryggisreglur verði til framtíðar. „Við höfum starfaði í allt, allt öðru umhverfi en nú er. Miklu friðsamara umhverfi og reynt að hafa þetta eins opið og kostur er. En það er ljóst að það viðhorf hefur orðið fyrir alvarlegu áfalli í dag," segir Helgi.

Helgi segir að Sturla Böðvarsson, forseti Alþingis, hafi fundað með forsætisnefnd og formönnum þingflokka vegna málsins í dag.