Lágmarksfjöldi íbúa sveitarfélaga hækkaður með lögum

Samgönguráðherra kynnir síðar í mánuðinum frumvarp sem hækkar lágmarksfjölda íbúa í sveitarfélagi úr 50 í eitt þúsund. Ráðherrann ræddi í gær við fulltrúa fámennra sveitarfélaga þar sem hann kynnti hugmyndirnar. Samkvæmt frétt á heimasíðu samgönguráðuneytisins lýsti Kristján L. Möller samgönguráðherra fyrirætlunum sínum en hugmyndir eru um að sveitarfélögum verði gefinn aðlögunartími til að vinna að sameiningum fram til ársins 2012. Eftir það myndi hin væntanlega lagabreyting taka gildi. Kristján tók þó fram á fundinum að ef rök mæltu með undanþágu yrði tekið tillit til sérstakra aðstæðna.

„Hátt í 50 forráðamenn eða fulltrúar sveitarfélaga með innan við þúsund íbúa sátu fundinn og lýstu þeir margir sig andvíga hugmyndum um að lögbinda lágmarksfjölda, sem sumir töldu til forsjárhyggju, en kváðust sammála því að sameina mætti sveitarfélög," segir á heimasíðu ráðuneytisins. „Fram kom hjá fundarmönnum að skilyrði fyrir frekari sameiningum væru til dæmis umbætur í samgöngu- og fjarskiptamálum og horfa yrði til margs konar landfræðilegra aðstæðna við sameiningar fremur en ákveðins íbúafjölda. Þar skiptu og tekjumöguleikar sveitarfélaganna höfuðmáli. Þá bentu nokkrir fundarmanna á góðan árangur af samvinnu sveitarfélaga um ýmsa þjónustu. Einnig kom fram í máli þeirra að brýnt væri að aukaframlag frá Jöfnunarsjóði sveitarfélaga, sem greitt var á þessu ári og því síðasta, fengist greitt áfram nú þegar séð væri fram á mikla tekjurýrnun sveitarfélaga," segir einnig.