Vélritar 245 orð á mínútu með yfir 99% nákvæmni

Réttarritarinn Melanie Humphrey-Sonntag, sem er þrefaldur Illinois-meistari í hraðritun og vélritar að meðaltali 245 orð á mínútu, stefnir nú á Bandaríkjameistaramótið í réttarhraðritun í Anaheim í Kaliforníu. Nákvæmni Humphrey-Sonntag mælist 99,193 prósent sem táknar að öllum líkindum að hún gerir ekki margar innsláttarvillur.

Humphrey-Sonntag hefur starfað við fagið síðan 1977. Hún var framhaldsskólanemi í Wyoming þegar maður frá réttarritaraskóla í Denver kom í heimsókn til að svipast um eftir efnilegu fólki í fagið.

Þar sem Humphrey-Sonntag hafði lært vélritun í skólanum og farist það nokkuð vel ákvað hún að slá til. Leyndardómurinn fólst auðvitað ekki í neinu öðru en þrotlausri æfingu. „Ég tileinkaði mér mjög góða aðferð með miklum orðastyttingum. Þetta var auðvelt fyrir mig þar sem ég gat einbeitt mér algjörlega að þessu fagi án þess að nokkuð annað væri að trufla mig," útskýrði hún.

Kynntist eiginmanninum í hraðritunarkeppni

Humphrey-Sonntag keppti í fyrsta sinn í réttarhraðritun árið 1990 en það eru Samtök réttarritara í Bandaríkjunum sem hafa veg og vanda af keppninni. Það var einmitt á þeirri samkomu sem hún kynntist tilvonandi eiginmanni sínum, Gary Sonntag, en fjölskylda hans hefur starfað við hraðritun á ýmsum vettvangi mann fram af manni síðan 1880.

Þau vélritararnir urðu hjón og stofnuðu fyrirtækið Sonntag Reporting Service og tóku að fást við hvort tveggja, lausablaðamennsku og hraðritunarkennslu. Gary lést eftir hjartaáfall árið 2005 og hefur ríkishraðritunarkeppnin í Illinois verið nefnd í höfuðið á honum æ síðan. Ekkja hans hefur borið sigur úr býtum í þeirri keppni þau þrjú ár sem síðan eru liðin.

Chicago Tribune greindi frá.