Hundraðkall á mann fyrir konungsfjölskylduna

Elísabet Englandsdrottning og fjölskylda hennar kostuðu breska skattgreiðendur 40 milljónir punda á síðasta ári, jafnvirði sex milljarða króna, sem jafngildir 99 krónum á hvert mannsbarn þarlent.

Þetta er hækkun um tvö prósent frá árinu á undan en Elísabet gerir þó allt til að draga úr rekstrarkostnaði sínum enda bendir fjármálastjóri konungsfjölskyldunnar á að raunkostnaðurinn sé nú þremur prósentum minni en árið 2001 að teknu tilliti til vísitölu.

Viðhald fasteigna er stærsti einstaki kostnaðarliðurinn og nemur rúmum 15 af milljónunum 40. Fjármálastjórinn segir þetta fullkomlega skiljanlegt, Buckingham-höll ein sé hreinasta martröð þegar kemur að því að halda húseignum í viðunanlegu standi.