Um 200 björgunarsveitarmenn að störfum í óveðrinu

Um það bil 200 björgunarsveitarmenn voru að störfum í gærkvöldi á sunnan- og vestanverðu landinu á meðan óveður gekk yfir með miklum vindhraða og úrkomu.

Samhæfingarstöð Almannavarna fékk 130 beiðnir um aðstoð og varð víða tjón, en þó hvergi stórtjón. Lausamunir fuku og sums staðar losnuðu þakplötur og lentu á bílum, negla þurfti fyrir glugga og um tíma var Hellisheiði og Vesturlandsvegi undir Hafnarfjalli lokað vegna veðurofsa.

Vindhraðinn fór upp í 55 metra á sekúndu undir Hafnarfjalli þegar verst lét og tveir bílar fuku út af veginum á Hellisheiði. Auk björgunarsveitarmanna voru lögreglumenn, slökkvilið og starfsmenn áhaldahúsa sveitarfélaganna að störfum. Veðrið gekk hratt yfir og var víðast hvar orðið hæglætisveður í nótt.