Bæjarstjórum berst fjöldi fyrirspurna

„Síðustu vikur höfum við fundið fyrir miklum áhuga fólks á búsetu í Vestmannaeyjum. Margar fyrirspurnir hafa borist, bæði til mín og atvinnurekenda,“ segir Elliði Vignisson, bæjarstjóri í Vestmannaeyjum.

Efnahagsástandið hefur gert það að verkum að margir höfuðborgarbúar líta til landsbyggðarinnar í von um atvinnu. Bæjarstjóri í Snæfellsbæ og sveitarstjóri í Skagafirði taka í sama streng og segja umleitanir um atvinnu hafa aukist töluvert upp á síðkastið, og von sé á að enn bætist við.

Spurður um atvinnuhorfur þeirra sem kjósa að flytja til Vestmannaeyja segir Elliði að góðir hlutir gerist hægt. „Við erum kannski ekki alveg tilbúin til að útvega atvinnu fyrir alla einn, tveir og þrír. Hér er hins vegar nægt húsnæði og feikilega mikil þjónusta. Við höfum hér stórt sjúkrahús, dvalarheimili aldraðra, framhaldsskóla, tvo barnaskóla og þrjá leikskóla og gætum auðveldlega, og með mjög litlum breytingum, þjónustað um 7.000 manns, þótt hér búi einungis um 4.000 manns.“

Í fyrsta sinn í átján ár mældist fjölgun á íbúum bæjarins fyrri hluta ársins.

Elliði segir þar mestu ráða væntingar fólks um stórbreyttar samgöngur með ferju í Landeyjahöfn.

„En fólk er líka að flytja hingað vegna þess að á næstu árum verða lífsgæðin á stöðum eins og þessum meiri en annars staðar. Hér er fólk ekki að missa vinnuna, stór hluti sam­félagsins er tekjuhár og með tiltölulega trygga atvinnu.

Hinn mikli samfélagslegi vilji til að lifa af sjávarútvegi og gera það besta úr auðlindinni breyttist ekkert í þensluumhverfinu. Við erum fiskveiðisamfélag og það eina sem getur breytt því eru misvitrar ákvarðanir og vanhugsuð örþrifaráð stjórnmálamanna,“ segir Elliði.

Guðmundur Guðlaugsson, sveitarstjóri í Skagafirði, segir eðlilegt að fólk horfi til landsbyggðarinnar í leit að atvinnu og búsetu.

„Hér í sveitarfélaginu munum við reyna að halda uppi því atvinnustigi sem verið hefur. Hér eru traust og öflug fyrirtæki og margt í kortunum sem gefur okkur tækifæri í framtíðinni. Hér hefur verið nóg að gera hjá iðnaðarmönnum og heldur vantað fólk en hitt. Það er erfitt að gera sér grein fyrir því hvað er fram undan en við erum til í slaginn,“ segir Guðmundur.

„Síðustu vikur hefur borið á því að fólk sem hefur tengingu við staðinn, á kannski foreldra hér eða frændfólk, komi hingað til að vinna, oft án fjölskyldunnar,“ segir Kristinn Jónasson, bæjarstjóri í Snæfellsbæ.

Hann bætir við að nú sé ólíkt auðveldara fyrir sveitarfélagið að fá alls kyns þjónustu en verið hefur.

„Nú eru alls konar höfðingjar að banka upp á og bjóða þjónustu sína sem ekki vildu tala við okkur fyrir sex árum,“ segir Kristinn.