Mörg þúsund manns mættu á Austurvöll

Útifundi á Austurvelli sem hófst klukkan þrjú er lokið. Undanfarna laugardaga hefur fólk komið saman fyrir framan Alþingishúsið og hefur fjölgað í þeim hópi með hverri vikunni sem líður. Aldrei hafa eins margir mætt og í dag og voru þúsundir manna samankomnir í miðbænum. Mótmælin fóru friðsamlega fram en eftir að fundi lauk var eggjum og klósettrúllum látið rigna á Alþingishúsið. Fyrir því stóð afmarkaður hópur mótmælenda en Hörður Torfason skipuleggjandi fundarins sagði í samtali við Stöð 2 að slík hegðun væri málstað almennings ekki til framdráttar.

Á meðal ræðumanna voru Kristín Helga Gunnarsdóttir rithöhundur, Andri Snær Magnason rithöfundur og Viðar Þorsteinsson heimspekingur.

Viðar sagði nauðsynlegt að Lýðveldið Ísland verði stofnað upp á nýtt. Þannig megi ná fram hreingerningu í þjóðfélaginu. Hann hvatti til þess að almenningur tæki völdin og benti á að reiði almennings væri á suðupunkti. Viðar sagði einnig að valdhafar og auðmenn beiti fjölmiðlum landsins til þess að gera lítið úr mótmælum almennings. Þannig væri beinlínis logið að fólki að hættulegur „skríll" væri að mótmæla á Austurvelli. Viðar hvatti til þess að almenningur, sem taka mun á sig skuldirnar, gefi engan afslátt þegar kemur að því að breyta þjóðfélaginu og að lokum krafðist hann lýðræðis án skilyrða.

Kristín Helga Gunnarsdóttir, líkti atburðum síðustu vikna við umferðarslys. Ríkisstjórnin hefði setið við stýrið á bremsulausri rútu á græðgishraðbrautinni sem hefði verið með bensínið í botni á eftir auðmönnum á sportbílum sem hefði endað með stórslysi. Kristín kallaði eftir því að gripið yrði til rafrænnar þjóðaratkvæðagreiðslu um allt sem varði þjóðarhag.

Á sama tíma fór fram svipaður fundur á Akureyri í dag vegna efnhagsástandsins. Á Akureyri var gengið frá Samkomuhúsinu inn á Ráðhústorg þar sem meðal annars Valgerður Bjarnadóttir og Hlynur Hallsson tóku til máls.