Olíuþjófar skildu bíl sinn eftir á vettvangi

Tveir karlmenn voru staðnir að verki við að stela dísilolíu af vörubílum, sem stóðu við Víkurhvarf í Kópavogi í nótt.

Öryggisvörður frá Öryggismiðstöðinni sá til þeirra og kallaði á lögreglu, en mennirnir forðuðu sér út í náttmyrkrið. Þeir skildu hinsvegar bílinn sinn eftir, Toyota jeppa, en í honum voru fullir olíubrúsar með 120 lítrum.

Auk þess voru þeir búnir að dæla í fleiri brúsa og hafa alls ætlað að ná sér í 200 lítra miðað við öll ílátin. Þeim er nú sá vandi á höndum að þurfa að sækja jeppann til lögreglunnar, þótt þeir hafi sloppið undan armi réttvísinnar í nótt.