Hljóp framúr strákunum í pilsi

"Pilsið var að vísu svart en ég var í bleikum sokkum. Ég fór í hlaupið með það markmið að ná besta tíma ársins hjá íslenskum konum. Það var bara svo skemmtileg tilhugsun að geta sagt frá því eftir á, að ég hafi gert það í pilsi, stóðst ekki freistinguna," segir Eva Margrét Einarsdóttir starfsmaður Glitnis en hún hljóp ásamt eiginmanni sínum Þórólfi, í Kaupmannahafnar maraþoninu síðastliðinn sunnudag.

"Það gekk allt saman upp og ég náði fimmta besta tíma íslenskrar konu í maraþoni frá upphafi. Svo er náttúrulega sérstaklega skemmtilegt að hlaupa framúr strákunum, í pilsi."

"Ég fékk ótrúlega mikið klapp, bros og hvatningu frá konunum á hliðarlínunni, gaman að geta bæði verið stelpuleg og hlaupið hratt."

"Ég byrjaði að hlaupa fyrir sex árum, þegar hún Bibba vinkona mín í vinnunni hvatti mig til að prófa og kom mér af stað, síðan var ekki aftur snúið."

"Ég hafði alltaf átt í vandræðum með þyngd og mataræði frá því ég var krakki, í hlaupunum fann ég það jafnvægi sem ég þurfti til að ná tökum á því," svarar Eva þegar Vísir forvitnast af hverju hún byrjaði að hlaupa maraþon.

"Ekki spurning. Það er svo einfalt að fara út að skokka, skella sér í skóna og taka smá hring. Við hjónin skiptumst á að hlaupa þegar þannig stendur á, en við hlaupum líka mikið saman, það er svona okkar tími," svarar Eva aðspurð hvort maraþonhlaup er fjölskylduvænt sport.

Góð ráð fyrir fólk sem langar að byrja að skokka? "Ég myndi ráðleggja fólki að byrja rólega en setja sér engu að síður ákveðin markmið. Félagsskapurinn skiptir líka miklu máli og það fyrsta sem ég myndi gera ef ég væri að byrja núna er að finna mér skokkhóp í hverfinu og láta vaða," segir Eva.