Útvarpskona á hlaupum

„Ég hef verið að jafna mig á hnémeiðslum undanfarna mánuði, en tók bara ákvörðun um að hlaupa og sjá hvað ég gæti í engu keppnisformi,"

segir Ragnhildur Magnúsdóttir útvarpskona á Bylgjunni. Hún hljóp tíu kílómetra í Reykjavíkurmaraþoni Glitnis á dögunum og var sú þrítugasta og sjöunda hraðskreiðasta í flokki kvenna.

Ragnhildur keppti þegar hún var í háskóla í Bandaríkjunum í 1500 og 5000 metra hlaupi, og hefur í gegnum tíðina verið dugleg að hlaupa sér til ánægju og heilsubótar. „Mig langar til að hlaupa maraþon einn daginn en þarf að koma mér í alvöru form fyrir svoleiðis," segir Ragnhildur. Hún bætir við að aðal tilgangurinn með hlaupinu nú hafi bara verið að taka þátt, enda mikil og góð stemning í Reykjavíkurmaraþoninu. „Ég er ánægð að íslendingar eru farnir að hlaupa meira. Þetta þótti hallærislegt hér áður fyrr," segir Ragnhildur. „Sem betur fer hafa viðhorfin breyst."