Hafa skutlað stjörnunum um Cannes í 25 ár

Eins og fram hefur komið í fjölmiðlum þá stendur nú yfir í Cannes, hin árlega kvikmyndahátíð franska kvikmyndaiðnaðarins. Fátt annað kemst að hjá Frökkum þessa tíu daga og Hollywood stjörnurnar flykkjast að til að fanga sviðsljósið.

Franski bílaframleiðandinn Renault hefur styrkt hátíðina í aldarfjórðun. Í tilefni af tímamótunum þá sendi bílaframleiðandinn fjölmiðlum í dag nokkrar myndir úr sögu hátíðarinnar, en heiðursgestum hefur alla tíð verið ekið um Cannes af einkabílstjórum í sérmerktum flota Renault bifreiða.

Tilraunir bílaframleiðanda til þess að koma bílum sínum í kastljós kvikmyndanna eru þó síður en svo nýjar af nálinni. 109 ár munu vera síðan fyrsta Renault bifreiðin kom fram í kvikmynd, en Renault verður 110 ára í ár. Bifreiðin sem þá lék lítið hlutverk á hvíta tjaldinu, var eitt af fyrstu sköpunarverkum Louis Renault, og kallaðist: „Voiturette" eða „bílkrílið" á íslensku.