Íhugar að leita réttar síns vegna ráðningar Orkumálastjóra

Ragnheiður Inga Þórarinsdóttir aðstoðarorkumálastjóri hefur beðið Össur Skarphéðinsson iðnaðarráðherra um að rökstyðja ráðningu nýs Orkumálastjóra og íhugar að leita til umboðsmanns Alþingis vegna ráðningar hans. Þetta kom fram í fréttum Ríkissjónvarpsins í kvöld. Ragnheiður segir jafnframt að annað starfsfólk Orkustofnunar sé undrandi á ráðningunni.

Ragnheiður hefur starfað sem Orkumálastjóri síðustu þrjá mánuði og var aðstoðarorkumálastjóri frá 2005. Hún lauk doktorsgráðu frá Danska Tækniháskólanum og MBA prófi frá Háskóla íslands með áherslu á fjármál og rekstur.

Níu sóttu um embætti orkumálastjóra og var Guðni A. Jóhannesson forstöðumaður Byggingartæknideildar Konunglega Verkfræðiháskólans í Stokkhólmi ráðinn úr þeim hópi.

Vísi hefur ekki enn tekist að ná tali af Össuri Skarphéðinssyni iðnaðarráðherra í kvöld.