Íslenskur Bond í kreppuútgáfu

Stikla fyrir nýja íslenska kreppuútgáfu Bond fer nú eins og eldur í sinu um netið. Myndin nefnist „The Fourth Cod War" og í takt við tíðarandann er hinn rammenski Bond ekkert góðmenni. Rússar eru í því hlutverki.

„Bond er vondi gaurinn, en Rússarnir koma og bjarga okkur," segir Helgi Már Erlingsson, sem leikur illmennið Bond. Vinur hans Arnar Ívarsson er hinsvegar í hlutverki Rússans góðviljaða.

Í myndinni er Bond til landsins til að endurheimta þá peninga sem hafa tapast á hruni íslensku bankanna. Seðlabankinn verður að sjálfsögðu fyrir barðinu á njósnara hennar hátignar.

Stiklan hóf líf sitt sem vinnustaðagrín hjá tölvufyrirtækinu D3, þegar starfsmennirnir voru á leið að sjá nýjustu Bond myndina, Quantum of Solace.

Helgi útilokar ekki að myndin komi út í fullri útgáfu, ef tekst að fjármagna hana. Og vonar að sjálfsögðu að hægt verði að leysa prentin út úr tollinum.

Hægt er að horfa á stikluna hér.