Ástandið í Newcastle er grátlegt

Glenn Roeder, fyrrum stjóri Newcastle og núverandi stjóri Norwich, segir að ástandið í herbúðum Newcastle sé grátlegt. Hann segir að upplausnin í herbúðum liðsins í kring um Kevin Keegan komi verst niður á stuðningsmönnum liðsins.

"Félagið er sorglegt um þessar mundir og það virðist sveiflast frá einum harmleiknum til annars. Það er engin stöðugleiki og hefur ekki verið lengi. Þeir fara frá einum stjóra til annars og fólkið sem þetta bitnar á er fólkið sem skiptir mestu máli - stuðningsmennirnir. Þegar talað er um að Newcastle sé frábært knattspyrnufélag, er það fyrst og fremst vegna þess að stuðningsmenn félagsins eru frábærir," sagði Roeder.