Neyðarlínan og Gæslan spari og flytji á Keflavíkurflugvöll

Utanríkisráðuneytið hafnar útreikningum Neyðarlínunnar sem kveðst geta starfrækt ratsjárkerfi fyrir 346 milljónum króna lægri upphæð en reksturinn kostar á þessu ári.

Í minnisblaði Neyðarlínunnar er gert ráð fyrir að ratsjáreftirlit yrði tekið úr höndun Varnarmálastofnunar og flutt frá Keflavíkurflugvelli í Björgunarmiðstöðina í Skógarhlíð í Reykjavík. Þar með flyttist þessi starfsemi undan utanríkisráðuneytinu og undir dómsmálaráðuneytið. Neyðarlínan telur kostnaðinn við rekstur eftirlitsins í Skógarhlíð mundu verða 476 milljónir króna. Samkvæmt fjárlögum þessa árs á reksturinn hins vegar að kosta 822 milljónir, eða 346 milljónum króna meira eins og áður segir.

„Minnisblað Neyðarlínunnar er því miður vanbúið gagn enda ekki byggt á réttum forsendum varðandi rekstur íslenska ratsjárkerfisins,“ segir í svari utanríkisráðuneytisins til Fréttablaðsins.

Utanríkisráðuneytið segir Neyðarlínuna ekki gera ráð fyrir umsýslu loftvarnarkerfis NATO, miðlun upplýsinga til herstjórna bandalagsins, sértækra viðhaldssamninga við NATO né ýmissa annarra krafna.

„Enginn stofnkostnaður er tilgreindur, ekki er gert ráð fyrir kostnaði við nauðsynlegar breytingar á húsnæði í Skógarhlíð né þeim breytingum sem gera þarf á nánasta umhverfi vegna öryggiskrafna. Þá er mannaflaþörf vanmetin í minnisblaðinu. Varnarmálastofnun er nú rekin í húsnæði sem bandaríski herinn skildi eftir og mikið hagræði er af að nýta. Mikill vannýttur húsnæðiskostur er á svæðinu sem gæti nýst fyrir hvers kyns öryggis- og björgunarstarfsemi.“

Ríkisstjórnin hyggst skipa nefnd sem á að skoða leiðir til að spara í rekstri Landhelgisgæslunnar, Varnarmálastofnunar, Siglingamálastofnunar og fleiri stofnana með því að samnýta aðstöðu eða starfsemi. „Eitt markmiða með starfi samlegðarnefndarinnar hlýtur að vera að finna hagræðingartækifæri fyrir fleiri innlendar stofnanir á varnarsvæðinu í Keflavík en þangað mætti til dæmis flytja starfsemi Landhelgisgæslunnar og hugsanlega Neyðarlínunnar og spara með því fé,“ bendir utanríkisráðuneytið á.