Samtals slösuðust 28 í jarðskjálftanum

Samtals slösuðust 28 í jarðskjálftanum þar af voru 21 með minniháttar meiðsl. 7 leituðu aðstoðar á slysadeild.

Fjöldi manns komu í fjöldahjálparstöðvar Rauða krossins, sem haldið var opnum fram eftir kvöldi í gær á Suðurlandi og verður stöðvunum bæði á Selfossi og Hveragerði haldið opnum áfram eftir því sem þörf krefur.

Vegir á jarðskjálftasvæðinu eru orðnir færir og hefur Vegagerðin lagfært sprungur og misfellur sem mynduðust í jarðskjálftanum. Í nágrenni Torfastaða í Grafningi rann stykki úr vegkantinum.

Um 75 heimilismanna í smáhúsunum við Ás í Hveragerði gista hjá aðstandendum, þar fóru mörg hús illa. Búið er að koma 50 heimilismanna fyrir á sjálfu heimilinu að Ási, auk þess sem 26 manns dveljast þar á hjúkrunardeildinni.

Vatn hefur verið gruggugt víða á svæðinu og til að leysa vatnsmálin voru tankbílar með vatn sendir bæði til Selfoss og Hveragerðis, auk drykkjarvatns á flöskum.