Myndar fræga fólkið í útlöndum

"Undanfarið hef ég unnið mikið í músíkljósmyndun. Ég varð að hvíla mig aðeins á tískunni," svarar Baldur Bragason sem starfar sem ljósmyndari í Svíþjóð þar sem hann hefur búið í 7 ár þegar Vísir spyr hann frétta.

Nordic Photos, sem er öflugur myndabanki, stofnaði nýverið umboðsskrifstofu ljósmyndara fyrir öll Norðurlöndin. Umboðsskrifstofan valdi fjóra sænska ljósmyndara og svo Baldur sem eina Íslendinginn. Svo vel vill til að einn af þessum fjóru sænsku ljósmyndurum er sambýliskona Baldurs, Ulrika Malm.

Baldur hefur verið upptekinn við að ljósmynda fræga fólkið í Svíþjóð en eitt af verkefnum hans í sumar er að mynda hljómsveitarmeðlimi Pink Floyd fyrir Polar Music Prize.

Vefur Baldurs - bragason.com.