Stærsti samningur OR frá upphafi

Í dag var skrifað undir stærsta samning sem Orkuveita Reykjavíkur hefur gert frá upphafi. Samningurinn er gerður við fyrirtækin Mitsubishi og Balcke-Dürr um kaup á fimm vélasamstæðum fyrir gufuaflsvirkjanir á Hengilssvæðinu.

Fjárhæð samningsins nemur um 13,7 milljörðum króna.

Undirritunin fór fram að viðstöddum forseta Íslands, Ólafi Ragnari Grímssyni, í Hellisheiðarvirkjun í dag og skrifuðu m.a. undir samningana Hjörleifur B. Kvaran forstjóri, f.h. Orkuveitu Reykjavíkur, Hiroyuki Iwase framkvæmdastjóri, f.h. Mitsubishi, og Claus Brinkmann forstjóri, f.h. Balcke-Dürr.

Vélakaupin eru gerð að undangengnu útboði þar sem fyrirtækin tvö áttu hagstæðasta boð. Hver vélanna fimm hefur 45 megavatta afl og er samanlagt afl þeirra þá 225 megavött. Þær verða afhentar á árunum 2010 og 2011 og settar upp í virkjunum á Hengilssvæðinu.

Í ávarpi sínu við undirritunina vísaði Hjörleifur B. Kvaran forstjóri OR meðal annars til jarðskjálftanna á Suðurlandi í gær og sagði:

"Í ljósi þeirra hamfara sem urðu hér á svæðinu í gær kunna menn að spyrja hvort ekki sé mikil áhætta í þessu fólgin. Auðvitað er það áhætta, en það er útreiknuð áhætta. Jarðvarmavirkjanir verða ekki byggðar nema á eldvirkum svæðum. Hin eftirsótta sérþekking sem útlendingar sjá hjá okkur Íslendingum felst einmitt hvað helst í því að við höfum mesta og besta reynslu af því að eiga við óvissu náttúruaflanna. Það sýndi sig í gær að mannvirkin hér stóðust áraun skjálftanna með mikilli prýði."

Þá nefndi Hjörleifur að vísbendingar væru um að afl borhola á Hengilssvæðinu hefði vaxið við skjálftana í gær.

"Um leið og hugur okkar er hjá þeim sem urðu fyrir búsifjum vegna jarðskjálftanna í gær, getum við líka hugleitt að jarðskjálftar eru líka endurnýjunarleið þeirrar auðlindar sem við erum að nýta. Ef ekki væri fyrir þessa hreyfingu jarðskorpunnar hér á eldvirka beltinu, myndi auðlindin smátt og smátt dala."

Strax klukkan sjö í gærmorgun óx afl borholu í Hverahlíð, sem tengd er sírita, um helming, en dalaði síðar lítið eitt. Jarðvísindamenn telja áhugavert að skoða hvort um hafi verið að ræða fyrirboða Suðurlandsskjálftanna síðar um daginn.