Segir ísbirni ekki í útrýmingarhættu

Hvurslags helvítis morðingjar eruð þið á Íslandi að drepa ísbirni!" segir Sigurður Pétursson - betur þekktur sem Siggi Ísmaður á Grænlandi. Hann dregur þó fljótt í land, "...nei, það er ekkert að því að drepa þessar skepnur ef maður étur bara kjötið."

Siggi segir það alrangt að ísbjarnarstofninn sé í útrýmingarhættu. Stofninn á austurströndinni telji um 12- 14 þúsund birni en veiðikvótinn aðeins 40 dýr; vegna pólitískrar rétthugsunar Vesturlanda sé sífellt verið að gera Grænlendingum erfiðara fyrir að veiða dýrin.

"Við borðum allavega ísbjörninn og verkum þá í staðinn fyrir að setja þá á söfn. En það eru allar þjóðir að skipta sér af þessu. Bandaríkjamennirnir eru verstir. En málið er að eina hættan sem steðjar af ísbjörnunum er vegna eiturefna. Og eiturefnin koma frá sömu þjóðunum og vilja friða dýrin!"

Spurður út í ísbjarnardrápið hér heima, þar sem ísbjörn var felldur fyrir ofan Þverárfjallsveginn, segir Siggi að Íslendingar megi skjóta alla ísbirni heimsins sín vegna. "Manni finnst samt skrýtið að þeir séu í allskyns samþykktum að stoppa okkar veiðar en skjóta svo bara fyrsta ísbjörninn sem rekur á land"

Siggi segir að ísbirnir séu tíðir gestir í smáþorpunum á Grænlandi.

"Þeir hafa komið hérna, tuttugu, þrjátíu stykki í bæina í vetur. Það er búið að vera svo mikill ís. Yfirleitt hlaupa þeir bara á flótta en stundum þarf að skjóta í þá svefnlyfi. Það er engin hætta af þessu. Stundum fara þeir í hundamatinn ef þeir eru svangir og krakkarnir leika sér í kringum þá. Reyndar eru einhverjar sögusagnir um að þeir hafi étið eina kellingu á Svalbarða en ég veit ekkert meira um það."

Sigurður Pétursson varð heimsfrægur þegar hann drap hákarl með berum höndum á veiðitúr á Austur-ströndinni. Hann býr í smábænum Kummiut og lifir á veiðum. Hann er einnig dyggur áhugamaður um skák og hefur verið í framvarðarsveit Hróksins í skákævintýrinu á Grænlandi.