Al Gore mættur á Bessastaði

Al Gore, fyrrverandi varaforseti Bandaríkjanna og handhafi friðarverðlauna Nóbels er mættur á Bessastaði. Þar stendur nú yfir blaðamannafundur en Gore er hér í boði forseta Íslands.

Að loknum blaðamannafundinum hyggst Gore funda með forsetanum en að þeim fundi loknum hefst vinnukvöldverður þar sem fulltrúar íslensks vísinda- og fræðasamfélags flytja stuttar kynningar um ýmis efni, s.s. nýtingu jarðhita, hlýnandi loftslag, bráðnun jökla o.fl.

Í fyrramálið flytur Gore erindi um hlýnun loftslags í boði Glitnis og Háskóla Íslands en hann hlaut friðarverðlaunin í fyrra fyrir framlag sitt á því sviði.

Að þessu loknu mun Gore kynna sér Hitaveitu Suðurnesja, Bláa lónið og starfsemi Glitnis á sviði endurnýtanlegra orkugjafa.