Innlent

Hámarkshúsaleigubætur hækka um 15 þúsund krónur

MYND/Pjetur

Hámarkshúsaleigubætur hækka úr 31 þúsund krónum í 46 þúsund krónur samkvæmt reglugerð sem Jóhanna Sigurðardóttir undirritaði í dag.

Húsaleigubætur hækka frá og með 1. apríl en þær hafa ekki hækkað í átta ár. Samkvæmt reglugerðinni hækka grunnbætur húsaleigubóta um 69 prósent, úr átta þúsund krónum í 13.500 krónur, bætur vegna fyrsta barns tvöfaldast, úr sjö þúsund krónum í fjórtán þúsund og bætur vegna annars barns hækka um 42 prósent, úr sex þúsund krónum í 8.500 krónur.

Fram kemur á vef félagsmálaráðuneytisins að í samkomulagi við Samband íslenskra sveitarfélaga um hækkun húsaleigubóta sé einnig kveðið á um þátttöku ríkisins í greiðslu sérstakra húsaleigubóta. Sveitarfélög eru hvött til að taka upp sérstakar húsaleigubætur og rýmka skilyrði fyrir sérstökum húsaleigubótum svo þær nái til fleiri heimila. Hámarksgreiðsla almennra og sérstakra húsaleigubóta gæti þar með orðið 70 þúsund krónur í stað 50 þúsund króna áður. Ríkið kemur nú í fyrsta sinn að greiðslu sérstakra húsaleigubóta.

Áætlaður árlegur viðbótarkostnaður vegna þessara aðgerða er um 620 milljónir króna vegna húsaleigubóta og um 100 milljónir króna vegna sérstakra húsaleigubóta. Samkomulag er um að ríkissjóður greiði 60 prósent af heildarkostnaði vegna hækkunarinnar og sveitarfélögin 40 prósent.

Mest lesið


Fleiri fréttir

Sjá meira


×

Mest lesið