Lætur Ferguson ekki spila með sig

Luiz Scolari, nýráðinn stjóri Chelsea, ætlar ekki að láta orð Sir Alex Ferguson koma sér úr jafnvægi, en stjóri Manchester United sendi Chelsea pillu í fjölmiðlum í dag.

Ferguson var beðinn að meta möguleika Chelsea í titilbaráttunni á næstu leiktíð og sagði þá að hann teldi Chelsea vera með of marga leikmenn yfir þrítugt til að berjast um titilinn.

Scolari lét þessi ummæli sem vind um eyru þjóta og neitaði að fara í orðastríð þegar hann var spurður út í þau á blaðamannafundi í dag.

"Ég svara þessari spurningu ekki. Þetta er ekki spurning sem ég þarf að svara. Við erum með mjög reynda leikmenn í okkar röðum og nokkra yngri menn, en að mínu mati held ég að við höfum reynslu til að keppa á öllum vígstöðvum," sagði Scolari.