Inter gefst ekki upp á Lampard

Ítalíumeistarar Inter munu koma með nýtt tilboð í miðjumanninn Frank Lampard í dag samkvæmt heimildum BBC. Chelsea neitaði tilboði upp á 7,95 milljónir punda í gær.

Þrátt fyrir að Luiz Felipe Scolari hafi gefið það út í gær að Lampard vildi vera áfram hjá Chelsea segir umboðsmaður leikmannsins að framtíð hans sé í óvissu.

Lampard á eitt ár eftir af samningi sínum en Scolari er jafnvel þegar búinn að finna arftaka hans ef hann hverfur á braut. Chelsea festi kaup á portúgalska miðjumanninum Deco frá Barcelona á dögunum.