Lögregla umkringir mótmælendur á Suðurlandsvegi

Aðgerðum við Suðurlandsveg virðist ekki lokið þótt flestir vörubílstjórar hafi flutt bíla sína af veginum.

Lögregla hefur nú umkringt bílstjóra og aðra almenna borgara sem standa á veginum og neita að fara. Einn vörubíll mun enn vera á veginum. Að sögn fréttamanns Stöðvar 2 á vettvangi eru á bilinu 40-50 lögreglumenn sem taka þátt í aðgerðunum, þar af eru um 16 sérsveitarmenn vopnaðir kylfum og skjöldum. Ástandið er sagt spennuþrungið en talið er að lögregla sé að búa sig undir að ryðja veginn.

Vörubílstjórarnir lokuðu Suðurlandsvegi við Rauðavatn um níuleytið í morgun og var þeim mjög heitt í hamsi. Þeir féllust þó á að færa bíla sína um tíuleytið og var talið aðgerðum væri þá lokið. Svo virðist ekki vera og nú er stál í stál.