Vilja jafnræði milli íslenskra og hollenskra innistæðueigenda

Þeir Hollendingar sem áttu yfir hundrað þúsund evrur á Icesave-reikningum Landsbankans þar í landi hafa sent íslenskum þingmönnum opið bréf þar sem farið er fram á að allir fjármunir þeirra verði tryggðir líkt og hjá Íslendingum í íslenskum bönkum.

Í bréfinu, sem fréttastofa hefur undir höndum, kemur fram að fulltrúar þessa hóps, sem telur um 470 manns, hafi heimsótt Ísland á dögunum til þess að reyna að fá svör um það hvar þeir geti nálgast fjármuni sína. Hollensk stjórnvöld tryggja aðeins innistæður upp að hundrað þúsund evrum, um 18 milljónum króna, sem þýðir að þessi hópur Hollendinga horfir fram á samtals 40 milljóna evra tap, jafnvirði um sjö milljarða króna. „Peningar sem við höfðum sparað til þess að kosta nám barnanna okkar, til kaupa á fasteign, sem lífeyri, til góðgerðastarfa og svo framvegis," segir í bréfinu.

Segja eignir Landsbankans dekka kostnaðinn

Fulltrúar þessa hóps Hollendinga segja enn fremur að þeir hafi mætt skilningi og vináttu hér á landi og jafnframt komist að því að eignir Landsbankans séu mun meiri en nemi þessari fjárhæð. Benda þeir enn fremur á að allar innistæður Íslendinga í íslenskum bönkum hafi verið tryggðar. Þá vísa þeir til þess að meðal skilyrða Alþjóðagjaldeyrissjóðsins fyrir láni til Íslendinga sé að jafnræðis sé gætt á milli innistæðueigenda. Það þýði í raun að bæta verði hollenskum innistæðueigendum fjármuni sína á sama hátt og íslenskum. Segist talsmaður hópsins vonast til að þingmenn gæti þess að þessa janfræðis verði gætt.

Bjóða samstarf til að skapa tækifæri fyrri Ísland

Í bréfinu er enn fremur sagt að það séu vissulega erfiðir tímar á Íslandi en að á fundum sínum hér á landi hafi fulltrúar hollenska hópsins fundið fyrir vilja til að leysa málið. Það vilji hópurinn endurgjalda með því að aðstoða Íslendinga. Verið sé að koma á fót síðunni Niceland.nl þar sem kynna eigi fyrirtæki og ferðaþjónustu á Íslandi með það fyrir augum að skapa ný tækifæri hér á landi.

Bæði hið íslenska og hollenska viðskiptaráð komi að samvinnunni sem gagnast muni báðum þjóðum. „Með því að aðstoða hvorir aðra við þessar aðstæður skapast grundvöllur fyrir góðu samstarfi á gjöfulli tímum. Tímum sem við erum fullviss um að renni aftur fljótt upp á Íslandi þar sem Íslendingar nýta náttúrulega krafta sína," segir einnig í bréfinu.