Sex mánaða dómur fyrir árás með glerflösku

Héraðsdómur Reykjavíkur hefur dæmt karlmann í sex mánaða fangelsi, þar af þrjá mánuði skilorðsbundna, fyrir að hafa slegið annan mann í andlitið með glerflösku þannig að hann hlaut 3,5 sentímetra skurð upp af hægri augubrún.

Atvikið átti sér stað fyrir utan skemmtistaðinn Broadway í desember í fyrra. Maðurinn játaði brot sitt og segist hafa verið hent út af Broadway vegna ölvunar. Þar lenti hann í stympingum með fyrrgreindum afleiðingum.

Dómurinn sagði að höggið hefði verið ásetningur og árásin sérstaklega hættuleg þótt áverkinn hefði verið tiltölulega lítill. Var tekið tillit til þessa við ákvörðun refsingar.