Þorbjörg Helga er Frakklandsaðdáandi

„Picasso safnið í Barcelona er alveg frábært," segir Þorbjörg Helga Vigfúsdóttir borgarfulltrúi. Hún skellti sér, ásamt fjölskyldu sinni, í sumarferð til Spánar og Frakklands til að hlaða batteríin eftir átök liðins vetrar í borgarstjórninni. Þorbjörg segist vera mikill Frakklandsaðdáandi en hún og Hallbjörn, eiginmaður hennar, bjuggu þar fyrir fáeinum árum, þegar Hallbjörn var í námi.

Þorbjörg og fjölskyldan voru í Languedoc héraðinu sem hún segir vera alveg yndislegt. Þar sé frekar rólegt og lítið um ferðamenn. Því sé öfugt farið í Barcelona þar sem hafi verið mikið líf. „Það sagði við mig Spánverji að það kæmu 65 milljónir túrista til Barcelona á ári, sem mér finnst reyndar alveg ótrúlegt," segir Þorbjörg í samtali við Vísi.

Þorbjörg var að spóka sig um á Laugaveginum þegar Vísir hafði samband við hana. „Það er alveg meiriháttar í svona góðu veðri," sagði Þorbjörg. Aðspurð sagðist hún ekki hafa séð Mel Gibson en kvaðst myndi hafa augun hjá sér ef hann kynni að vera í nágrenninu.

Vísir hóf í gær greinaflokkinn „Borgarfulltrúar í sumarfríi", þar sem borgarfulltrúum gefst tækifæri á að tjá sig um önnur og léttari málefni en REI málið og tíð borgarstjórnarskipti. Það var Svandís Svavarsdóttir sem reið á vaðið og sagði frá ferð sinni til Flateyrar.