Kynnir Johnny Logan fyrir Goldfinger

"Ég er svo sem ekkert að fara að velta mér uppúr Eurovision slögurum eins og svín í stíu," svarar Sverrir Stormsker þegar Vísir spyr hann út í slagarana sem hann tekur ásamt hljómsveit rétt áður en Johnny Logan stígur á svið á Broadway föstudagskvöldið 23. maí næstkomandi.

"Ég tek náttúrulega Sókrates, í nefið, nú eða rassgatið, en fer svo yfir í aðra þekkta frumsamda sálma eins og "Horfðu á björtu hliðarnar" og "Þórð" og eitthvað svoleiðis namminamm. Læt Lókinn (Johnny Logan) um Júróið enda er hann margfaldur Evrópumeistari í þeirri grein."

"Johnny Lókur er fínn sveppur. Hitti hann út í Írlandinu þegar ég var að dandalast í keppninni og hann bauð okkur á einhvern lítinn skemmtistað þar sem hann söng nokkur lög fyrir okkur af stakri snilld," segir Sverrrir þegar talið berst að Johnny.

"Ég er einmitt að fara að borða með honum í kvöld og ætli við tökum ekki nokkra Irish coffee líka og hver veit nema við endum alveg hélaðir á Goldfinger í góðum fíling innan um kófsveittar bikaðar blöðrur. Gæinn heitir nú ekki Johnny Lókur fyrir ekki neitt."

Færðu frítt að borða glæsiréttina sem eru í boði fyrir gestina á Broadway? "Ég ætla rétt að vona það. Annars myndi ég náttúrulega aldrei láta hafa mig út í þetta. Líf mitt gengur út á að labba á milli húsa og spila fyrir þriggja rétta glæsimáltíðum. Ég er kominn með fulla frystikistu af þessu dóti."