Hátt í þúsund lítrar af olíu láku í Sundahöfn

Slökkvilið höfuðborgarsvæðisins vinnur nú að því að hreinsa upp 900-1000 lítra af dísilolíu sem láku úr flutningaskipinu Laxfossi fyrr í dag.

Tilkynnt var um lekann um þrjúleytið og voru bæði bátar slökkviliðs og bílar sendir á vettvang ásamt mengunarteymi slökkviliðsins. Fljótlega tókst að komast fyrir lekann en skipið liggur við bryggju við korngeymslurnar í Sundahöfn og að sögn slökkviliðs var um 800 fermetra olíuflekkur í höfninni.

Menn eru nú á lóðsinum og dreifa niðurbrotsefni yfir olíuflekkinn og þá er dælubíll á staðnum sem dælir olíumenguðum sjó upp úr höfninni. Að sögn slökkviliðs er tölvuerð vinna fram undan en það fari eftir veðri og sjávarföllum hversu langan tíma hreinsunin taki.