Listamenn til sýnis í Húsdýragarðinum

Hópur ungra listamanna vöktu athygli í Húsdýragarðinum í liðinni viku. Þau hreiðruðu um sig innan girðingar og settu upp skilti líkt og þau væru líka eitt af húsdýrunum - og til sýnis.

"Þetta var svona gjörningur um manninn sem dýr. Við settum upp samskonar plakköt og fyrir utan hin búrin með upplýsingum um fengitímann, fjöslkyldustærð og svoleiðis. Við vorum bara eins og dýr í dýragarði," segir Snæbjörn Brynjarsson einn meðlima hópsins sem kallast Stígis.

Snæbjörn er nýútskrifaður úr Fræði og Framkvæmd í Listaháskóla Íslands og því ekki ókunnugur framúrstefnulegri gjörningalist.

"Fólk tók þessu vel. Það var mikið hlegið og fylgst með. Ég held reyndar að yngstu krakkarnir hafi lítið botnað í þessari nýju húsdýrategund en það varð enginn mógðaður - nema kannski unglingarnir sem reyndu að ögra okkur með því að hrópa til okkar."

Stígis hópurinn hefur vakið athygli í miðbænum í sumar. Þau hafa stundað svokallað feluleikhús - þóst vera ungir bankastarfsmenn að tapa milljónum á kaffihúsum og svo hefur hópurinn staðið fyrir skylmingareinvígjum á Laugaveginum.

"Við erum öll í vinnu hjá Reykjavíkurborg gegnum Hitt Húsið í sumar," segir Snæbjörn en auk hans eru í hópnum Kjartan Yngvi Björnsson og Unnur Birna Björnsdóttir. Næstu helgi mun opna ljósmyndasýning í Hinu húsinu þar sem fólki gefst færi á að virða fyrir sér afrakstur þessara framsæknu listamanna.

í Sláturhúsi 5 eftir Kurt Vonnegut ferðast Billy Pilgrim um í tíma og rúmi og endar í lokuðu búri með klámmyndastjörnunni Montana Wildhack á plánetunni Tralfamadore. Hvernig leið Snæbirni að vera til sýnis í dýragarði.

"Þetta var nú bara svipað og vera niðrí miðbæ svosem. Maður var bara pínu betur rammaður inn."