Fjöldafundur fólks í hátækni- og sprotageiranum í dag

Boðað hefur verið til fjöldafundar meðal fyrirtækja og fólks í hátækni- og sprotageiranum á Hilton Reykjavík Nordica klukkan fjögur í dag.

Fundurinn ber yfirskriftina „Núna" er tækifærið og er vísað til þess að nú sé tækifæri til að hefja markvissa uppbyggingu hátækni- og sprotafyrirtækja með virku samstarfi fyrirtækja og stjórnvala. Fyrirtæki í þessum geirum kynna starfsemi sína, koma með góðar fréttir um árangur af þróunar- og markaðsstarfi og kynna tilboð sem fela m.a. í sér að þau geti bætt við sig fólki að því gefnu að tiltekin starfskilyrði og stoðir til nýsköpunar séu fyrir hendi.

Þá kemur fram í tilkynningu frá aðstandendum að ráðherrar taki til máls ásamt Björk Guðmundsdóttir söngkonu og fleirum. Að fundinum standa Samtök iðnaðarins, Samtök líftæknifyrirtækja, Samtök sprotafyrirtækja, Samtök upplýsingafyrirtækja og Háskólinn í Reykjavík.