Veðurbörnin á Stöð 2 sett í megrun

Glöggir áhorfendur veðurfrétta á Stöð 2 hafa líklega tekið eftir því að teiknimyndabörnin sem notaðuð hafa verið til að sýna yngstu meðlimum þjóðfélagsins hvernig er best að búa sig hafa hríðhorast undanfarið.

„Ég neita því ekki að ég hef fengið ábendingar um að sumum hafi fundist þau óþarflega sver," segir Sigurður Þ. Ragnarsson yfirveðurfræðingur á fréttastofu Stöðvar 2. Mikil umræða hefur verið í þjóðfélaginu um meintan offitufaraldur hjá börnum, en Sigurður þvertekur þó fyrir að með að fréttastofan sé með því að megra teiknibörnin að leggja lóð sitt á vogarskálarnar í þeirri umræðu.

„Það er einföld ástæða fyrir þessu. Við erum eins misjöfn og við erum mörg. Við vorum að tala í notkun fjölbreyttari búninga og ákváðum þá að í gegnum þá búninga sæist sá þverskurður sem einkennir börnin í samfélaginu. Þetta hefur samt ekki þá djúpu meiningu sem fólk kannski heldur," segir Siggi, sem hefur sjálfur ekkert á móti holdamiklum börnum.

„Bústin börn geta verið miklu sætari en horuð börn. Það breytir því ekki að búningarnir í veðrinu eru einmitt settir upp til að krakkarnir geti hreyft sig án þess að verða kaldir og kvefaðir. Mér finnst þeir krúttlegir á hvorn veginn sem er."