Pavlyuchenko samdi til fimm ára

Rússneski framherjinn Roman Pavlyuchenko gekk í dag formlega í raðir Tottenham á Englandi fyrir 14 milljónir punda og skrifaði undir fimm ára samning. Hann er 26 ára gamall og kemur frá Spartak í Moskvu. Pavlyuchenko vann sér það helst til frægðar að skora tvívegis fyrir Rússa í landsleik gegn Englendingum fyrir ári síðan.

Hann skoraði auk þess þrjú mörk fyrir spútniklið Rússa á EM í sumar og ætti koma hans að létta nokkuð á Juande Ramos knattspyrnustjóra Tottenham - sem hefur aðeins geta teflt fram einum framherja í undanförnum leikjum.

Breskir fjölmiðlar bíða nú með öndina í hálsinum eftir því hvort þetta þýðir að Dimitar Berbatov muni fara frá Lundúnafélaginu til Manchester United.