Pétur Blöndal vill að ríkið taki atvinnulífið sér til fyrirmyndar

Pétur Blöndal þingmaður Sjálfstæðisflokksins segir að ef hið opinbera neyðist til að lækka launakostnað sinn þá ætti heldur að grípa til þess að lækka vinnuhlutfall starfsmanna í stað þess að segja sumum þeirra upp að fullu. Þetta kom fram í fyrirspurn sem hann beindi til fjármálaráðherra þar sem hann spurði hvernig standi á því að Ríkisútvarpið skuli grípa til þess að segja upp fólki endanlega í stað þess að minnka vinnuhlutfall starfsmanna líkt og gert hafi verið í atvinnulífinu.

Pétur benti á að þegar Finnar lentu í sinni kreppu árið 1990 hafi atvinnuleysi aukist mikið í landinu og að það hafi lítið dregið úr því til þessa dags.

Þess vegna hafa aðilar vinnumarkaðar og Alþingi breytt lögum um atvinnuleysistryggingasjóð sem gera það að verkum að fólki er frekar sagt upp að hluta en að fullu. Í ljósi þess að RÚV sagði upp starfsmönnum á dögunum að fullu vildi Pétur vita hvort þetta væri almennt stefna hins opinbera.

Árni svaraði Pétri og sagðist ekki hafa haft neina aðkomu að uppsögnum RÚV. Hann sagði almennt að það myndi fara eftir hverju ráðuneyti hvað verði gert og umfangið muni fara eftir því hvernig fjárlögin verða. Hann sagði þó að engar sérstakar línur í þessum efnum hefðu verið lagðar fyrir ríkisstofnanir.

Pétur fór aftur í pontu og skoraði þá á fjármálaráðherra að taka frekar upp hluta-atvinnuleysi frekar en fullt. „Ég skora á hæstvirtan ráðherra að vinna þannig að lausn þessara mála þannig að fólki sé frekar sagt upp að einum fjórða heldur en að fjórðungi fólks sé sagt upp að fullu," sagði Pétur.

Að sögn Péturs sýna rannsóknir að stór hluti þeirra sem lenda í viðvarandi atvinnuleysi fara aldrei aftur út á vinnumarkaðinn.