N1 og Atlantsolía lækka verð á eldsneyti

N1 hefur ákveðið að lækka verð á bensíni og dísilolíu. Lítri af bensíni lækkar um 4 krónur og lítri af dísilolíu lækkar um 6 krónur.

Þetta kemur fram í tilkynningu frá N1. Ástæða lækunarinnar mun vera vegna sterkari stöðu krónunnar gagnvart erlendum gjaldmiðlum og lækkun á heimsmarkaðsverði á eldsneyti.

Frá byrjun október sl. eða á tveimur mánuðum hefur N1 lækkað verð á lítra af bensíni um kr. 38,90 og á dísilolíu um kr. 33,00.

Atlantsolía hefur einnig lækkað verð á bensíni um 4 krónur og dísel um 6 krónur. Eftir lækkun kostar lítrinn hjá Atlantsolíu á bensíni 137,20 og á dísel 164,90 krónur.

Þann 1. október kostaði bensínlítrinn hjá Atlantsolíu 172,10 og hefur því lækkað um 35 krónur á tveimur mánuðum.

Skeljungur hefur einnig lækkað eldsneytisverð.  Bensín hefur lækkað um 4 kr. og dísel um 6 kr. Eftir lækkun er verð í sjálfsafgreiðslu á bensíni 138,80 kr. hver líter og á dísel 166,40 kr. hver líter.