Madonna og Guy loksins að skilja?

Hjónaband poppdrottningarinnar Madonnu og leikstjórans Guy Ritchie mun endanlega vera að renna út í sandinn. Breska blaðið Daily Mirror hefur það eftir vinum parsins að þau lifi nú alveg aðskilin á heimili sínu í London. Þau hyggist tilkynna um skilnað sinn þegar Madonna hefur lokið tónleikaferð sinni í lok nóvember.

„Þau eru eins og systkyni meira en hjón, og þótti því best að segja þetta gott," er haft eftir vininum. „Þeim finnst þetta sorglegt, en eru staðráðin í að skilja á góðu."

Parið kynntist í samkvæmi hjá popparanum Sting árið 1998, og giftu sig í kastala á Skotlandi tveimur árum síðar. Það hafa lengi verið vangaveltur um hjónabandsvandræði hjá parinu. Svo virðist sem soðið hafi upp úr árið 2005 þegar þau ættleiddu lítinn dreng frá Malawi. Nokkuð sem Richie hafði lítinn áhuga á því að gera. Madonna lét hafa það eftir sér í heimildamynd á MTV skömmu síðar að hún vildi „ljúka þessu öllu", þar sem eiginmaðurinn hefði ekki reynst standa undir væntingum hennar.