IMF lánar Íslendingum 2,1 milljarð dollara

Stjórn Alþjóðagjaldeyrissjóðsins samþykkti á fundi sínum í Washington í gærkvöldi,að lána Íslendingum rúma tvo milljarða dollara til að koma á efnahagsstöðugleika hér á landi.

Við þetta bætast svo lán upp á um það bil þrjá milljarða dollara frá Svíum, Dönum, Norðmönnum, Finnum, Rússum, Pólverjum og Færeyingum. Þar með næst sú upphæð sem íslensk stjórnvöld telja að þurfi til að bregðast við efnahagsvandanum.

Í tilkynningu frá forsætisráðuneytinu segir að fjármunirnir frá Alþjóðagjaldeyrissjóðnum verði notaðir til að styrkja krónuna og verður hún sett á flot um leilð og stuðningur við hana verður talinn nægilegur til þess. Þess er að vænta, segir í tilkynningunni, að gjaldeyrisviðskipti færist þá fljótlega í eðlilegt horf og milliríkjaviðskipti fari að ganga hnökralaust.

Geir H. Haarde forsætisráðherra fagnar afgreiðslu sjóðsins og segist afar þakklátur þeim þjóðum sem leggja okkur lið í samstarfi við sjóðinn.