Sakar lögreglu um óþarfa harðræði

Sturla Jónsson, talsmaður vörubílstjóra, sakar lögregluna um óþarfa harðræði í átökunum á Suðurlandsvegi í morgun. Þetta kom fram í viðtali Láru Ómarsdóttur, fréttamanns Stöðvar 2, viðð Sturlu á vettvangi.

Á bilinu 40-50 lögreglumenn eru á staðnum og hefur lögregla strengt upp borða sem skilur að mótmælendur og lögreglu. Til átaka kom í morgun og voru sex manns handteknir. Enn er mikil spenna við Rauðavatn og mótmælendur, bæði vörubílstjórar og almennir borgarar, neita að gefa eftir.

Sturla Jónsson segir að aðgerðir lögreglu sýni að fólkið í landinu megi ekki láta í ljós skoðanir sínar því þá verði það barið niður. Hann segir upptök átakanna hafa verið á þann veg að einn bílstjóranna hafi ætlað að fjarlægja bíl sinn en lögregla hafi meinað honum það. „Svo byrjaði lögreglan að meisa fólk," segir Sturla sem sjálfur fékk piparúða í augun. „Ég fékk alveg þokkalega gusu," segir Sturla og segir lögreglu hafa sparkað í liggjandi mann í átökunum.

Aðspurður hvort ekki væri viðbúið að lögregla myndi bregðast við aðgerðunum sagði Sturla að menn væru ekki að bíða eftir lögreglunni heldur því að þingmenn færu að vinna vinnuna sína.

Þá sagðist hann aðspurðu að honum heyrðist á mönnum að aðgerðum væri ekki lokið af hálfu vörubílstjóra.