Curbishley segir af sér hjá West Ham

Alan Curbishley hefur sagt af sér sem knattspyrnustjóri West Ham í ensku úrvalsdeildinni.

Curbishley er sagður hafa fært Björgólfi Guðmundssyni uppsögn sína í dag og breska ríkissjónvarpið heldur því fram að Curbishley hafi verið ósáttur við stefnu félagsins í leikmannamálum.

West Ham seldi bæði Anton Ferdinand og George McCartney á dögunum og sagði brottför þeirra í takt við framtíðaráform félagsins.

Curbishley tók við West Ham í desember árið 2006 og undir hans stjórn vann liðið 28 sigra í 71 leik.

Orðrómur er á kreiki um að það verði Ítalinn Gianluca Nani sem verði fenginn til að taka við starfi Curbishley tímabundið, en hann var ráðinn yfirmaður knattspyrnumála hjá félaginu í vor.

Veðbankar á Englandi hallast að því að Slaven Bilic sé hinsvegar líklegastur til að taka við starfi Curbishley þegar fram í sækir, en hann er landsliðsþjálfari Króata og fyrrum leikmaður West Ham.