Geir staðfestir að breytingar verði á eftirlaunum ráðamanna

Frumvarp um breytingar á eftirlaunalögunum verður vonandi lagt fyrir Alþingi í næstu viku, að sögn Geirs H. Haarde forsætisráðherra. Geir segist ekki vilja nefna nein efnisatriði í frumvarpinu en vísaði í stjórnarsáttmálann varðandi það. Þar er gert ráð fyrir að eftirlaunakjör alþingismanna og ráðherra verði endurskoðuð og meira samræmi komið á í lífeyrismálum ráðamanna og almennings.

Geir sagði að breytingarnar á eftirlaunafrumvarpinu væru ekki eins einfaldar og margir hefðu gefið til kynna og að breytingarnar sem gerðar hafi verið árið 2003 væru ekki eins miklar og margir hefðu haldið fram.