Keith Richards varar Winehouse við eiturlyfjum

Gítarleikari Rolling Stones Keith Richards hefur varað söngkonuna Amy Winehouse við að hún eigi ekki langt eftir taki hún sig ekki á varðandi eiturlyfjaneyslu sína.

Gítarleikarinn sem er frægur fyrir eigin eiturlyfjaneyslu lét ummælin falla eftir að hann sá mynd af Winehouse þar sem hún reykti krakk. Hann sagði jafnframt í viðtali við The Mail on Sunday að Winehouse væri eina nútíma poppstjarnan sem hann mæti að verðleikum. Í viðtalinu talaði hann einnig opinskátt um eigin eiturlyfjaneyslu.

Mick Jagger sagði einnig í viðtalinu að tónlist Winehouse myndi verða fyrir barðinu á eiturlyfjaneyslunni vegna tímans sem færi í afskipti lögregla af neyslunni.

Richards sem er 64 ára svaraði í viðtalinu hvaða nútímalistamann hann kynni að meta „Það er aðeins ein manneskja. Þessi stelpa Amy. En hún verður að snúa við blaðinu." Hann átti þó ekki von á að hún hlustaði á skilaboðin.

„Ég er enginn trúboði. En ég hef verið þarna og þú verður að koma skilaboðunum til hennar," sagði hann í viðtalinu.

Fyrrverandi heróínfíkillinn viðurkenndi að reykja stöðugt hass og sagði að hann hefði eitt sinn verið í svo mikilli vímu að hann hafi látið flugelda brenna einn fingur inn að beini.

Jagger talaði um vandræði Rolling Stones með lögregluna varðandi eiturlyf á áttunda áratugnum. „Þau tóku algjörlega yfir skapandi hlið okkar og við gátum ekki þetta eða hitt, við eyddum öllum tima okkar í samskipti við lögregluna" sagði hann og bætti við að það sama væri að gerast hjá Amy.

„Að koma fram er eins og kynlíf. Það er fíkn. En til að gera það vel getur maður ekki gert það stöðugt," sagði Jagger að lokum.