Sköllóttir fótboltamenn auglýsa Wella- hárvörur

„Við erum alltaf að minna á vörurnar okkar og nú langaði okkur að tengja okkur við fótboltann og gera eitthvað skemmtilegt,“ segir Ásgeir Sveinsson, framkvæmdastjóri Halldórs Jónssonar ehf. sem er með umboð fyrir Wella.

Blaðaauglýsing er væntanleg frá fyrirtækinu og skartar hún sköllóttum knattspyrnumönnum í aðalhlutverki. „Ég hafði verið með hugmynd í kollinum í langan tíma og hafði samband við Sigmund Kristjánsson félaga minn og fékk hann til að smala saman nokkrum glæsilegustu knattspyrnumönnum landsins. Þeir eiga það sameiginlegt að vera ekki meðal okkar uppáhaldsviðskiptavina þegar kemur að hárvörum, enda ekki með neitt hár. Þessir snillingar tóku hugmyndinni ótrúlega vel enda húmorinn í lagi.“

Tryggvi Guðmundsson er lykilmaður í liði sköllóttra knattspyrnumanna. Hann segist ekki hafa átt von á því þegar hár hans tók að þynnast að einn daginn myndi hann leika í auglýsingu fyrir hárvörur. „Nei, varla,“ segir Tryggvi. „En ég er nú gæddur þeim eiginleika að mér finnst gaman að gera grín að sjálfum mér.“ Honum lýst vel á liðið en viðurkennir að það mættu vera fleiri varnarmenn.

„Já, þetta er alvöru lið og mjög góður hópur. Ég vildi fá Auðun Helgason í vörnina, en hann er enn í afneitun þannig að hann náði ekki inn,“ segir Tryggvi sem sjálfur gekk í gegnum skeið afneitunar. „Já hún er leiðinleg þessi afneitun. Við höfum allir lent í þessu. Verið að greiða yfir og allt hvað eina.“ Nú er það draumur Tryggva að hin sköllótta hersing skori á ellefu menn með afró á knattspyrnuvellinum og aldrei að vita nema draumurinn rætist.

Það skýtur skökku við að einn í sköllótta Wella-liðinu, Davíð Þór Viðarsson FH-ingur, er hvergi nærri orðinn sköllóttur. „Nei ég er ekki sköllóttur, það er alveg rétt. Hins vegar viðurkenni ég fúslega að sú gæti orðið raunin eftir 5-10 ár. Faðir minn býr til að mynda svo vel að vera sköllóttur. Þannig að það er bara gaman að taka forskot sæluna,“ segir Davíð Þór Viðarsson, knattspyrnumaður og hármódel.